الوطن اليوم الإخبارية – 9 فبراير 2026
كتب | خالد شريف
كشف الإعلامي سيف زاهر، في تصريحات عبر قناة “أون سبورت”، قرار إدارة النادي الأهلي النهائي بشأن مصير لاعب الفريق إمام عاشور بعد الأزمة الأخيرة، مؤكداً أن الإدارة لن تتدخل في عقده حتى نهاية الموسم الحالي.
وقال سيف زاهر: «واحد يقولي هي قصة إمام عاشور راحت على فين؟ أنا هقول لحضراتكم اللي ماتقالش قبل كده، وهقول لحضراتكم الكواليس اللي ما حدش يعرفها، وهقول لحضراتكم مفاجآت هتبقى جديدة وهتفجر الدنيا».
وأضاف: «في بعض الناس تقولك هو إمام عاشور ده يعني إدارة الأهلي مش هتدخل هتسيبه كده على الـ18 أو على الـ20 مليون؟ مفيش ترضية؟ مفيش تسخينة كده عشان الراجل ده يلعب؟».
وتابع: «إدارة الأهلي لم تتدخل في عقد إمام عاشور حتى نهاية الموسم. طيب وبعد انتهاء الموسم؟ بنسبة 90% هتدخل إدارة الأهلي لو في تجديد تلات سنين، على السنتين المتبقيين هيخش إدارة الأهلي بزيادة مقبولة».
وأكد سيف زاهر أن إمام عاشور لن يحصل على 90 أو 100 مليون مثل زيزو، موضحاً: «إدارة الأهلي كابتن سيد عبد الحفيظ مع كابتن محمود الخطيب مع الكابتن وليد صلاح الدين حطوا سقف للشغلانة دي، وليكن 25-30 مليون جنيه، ده أغلى لاعب هيبقى موجود في النادي الأهلي (ماليش دعوة بالأجانب وماليش دعوة بزيزو)».
وأردف: «كلمة السر داخل النادي الأهلي الفترة القادمة في احتفاظ النادي الأهلي بلعيبته هو أحمد حسام عوض عضو مجلس إدارة النادي الأهلي وشركة الكرة».
وأكمل: «يعني شركة الكورة جابت إمام عاشور بهدوء وقالتله: إمام، إنت دلوقتي من أغلى اتنين تسويقياً في مصر (زيزو وإمام عاشور)».
وأوضح: «في عروض مقدمة من الشركات سواء في رمضان أو بعد رمضان تتخطى الـ20 مليون جنيه في عقود جاية لإمام ولزيزو الفترة الجاية».
وختم سيف زاهر قائلاً: «النهاردة أما الراجل يقعد مع شركة الكورة يقوله إنت النهاردة عقدك 20-25، وعندك بونص النهاردة شركة الكورة هتجيبها إعلانات بكذا، يبقى إنت من غير ما تخش في أي خلاف أو خناقة مع النادي الأهلي إنت رحت للـ50 والـ55 والـ60 عشان إنت في النادي الأهلي».
وأشار إلى أن هذه السياسة نفسها ستطبق على حسين الشحات الذي سيجدد عقده بـ17 أو 20 مليون جنيه في النادي الأهلي.
